Hinn þekkti tvívíddarleikur Tetris lætur notandann raða saman hlutum sem falla niður, með því að færa þá og snúa þeim. Hlutirnir sem notaðir eru í Tetris eru fjórblokkir (tetrominos, en það eru 7 mismunandi útgáfur af þeim í tvívídd. Fjórblokkir eru ein gerð fjölblokka (polyominos). Önnur, einfaldari, gerð er þríblokk (tromino eða triomino), þar sem aðeins eru til tvær grunngerðir (eins og sést á myndinni efst á þessari síðu). Í þessu forritunarverkefni eigið þið að forrita í hreinu WebGL þrívíddarútgáfu af leik sem er eins og Tetris, nema hann notar bara þríblokkir. Við getum kallað hann Trisis (eða Þrísis á íslensku!). Hjá okkur eru því þríblokkirnar samsettar úr þremur teningum (í stað ferninga í Tetris). Í leiknum eigið þið að vinna með kassa sem er 6x6 að botnfleti og 20 á hæð. Þríblokkirnar falla niður innan í kassanum, eitt lag í einu og það á að vera hægt að snúa þeim og færa þær til innan kassans. Þar sem við erum nú í þrívídd, þá er hægt að snúa um þrjá ása. Þið skuluð nota a/z til að snúa um x-ás, s/x til að snúa um y-ás og d/c til að snúa um z-ás. Þá eru allir fjórir örvalyklarnir notaðir til að færa þríblokkina til. Auk þess á að vera hægt að slá á bilstöngina (space) til að láta blokkina detta hratt niður. Loks á að vera hægt að snúa kassanum á alla kanta með músinni, til að geta séð betur hvernig blokkirnar liggja. Það er best að hafa línur á kassanum til að auðveldara sé að sjá hvar fallandi þríblokkin er á hverjum tíma og hann þarf að vera gegnsær til þess blokkirnar sjáist vel.

Forritið ykkar þarf að geta látið blokkirnar lenda á réttum stað, þ.e. láta þær setjast ofan á blokkum sem þegar eru komnar á botninn. Það þarf líka að geta séð hvenær einn flötur er alveg fylltur, en þá þarf sá flötur að hverfa og gefa leikmanni stig fyrir það. Það er hægt að skrifa stigin bara beint í HTML-skjalið.